Краіна адаптуецца да змен, выкліканых часам, мы вяртаемся ўсё часцей і глыбей да вытокаў, да ўсяго народнага, нацыянальнага. Гэта было заўсёды. Наш народ стагоддзямі захоўваў традыцыі і культурныя каштоўнасці.
Але зараз гэта стала яшчэ больш гарманічна, глыбей, магутней. Мы нібы ўсвядомілі з новай сілай: патрэбна гістарычная памяць, каб нашыя дзеці жылі ў такой жа дзяржаве, якая ёсць у нас.
Работнікі культуры Іўеўскага раёна праводзяць мерапрыемствы, дзе галоўнае — пераемнасць ад старэйшага пакалення да малодшага. Так будзе захавана невычэрпная беларуская спадчына.
У шэрагу такіх мерапрыемстваў – этнічная вечарына “Славутыя майстры Іўеўшчыны”, якая прайшла ў аддзеле рамёстваў і традыцыйнай культуры Іўеўскага цэнтра культуры і вольнага часу.
Тут прайшлі майстар-класы па розных напрамках традыцыйных рамёстваў, была арганізавана выстаўка народнай творчасці работ майстроў клуба «Скарбніца».
— У краі, дзе я жыву, усё міла і прыгожа, шмат песень, і кожны можа паказаць сваё майстэрства, — як заўсёды, паэтычным радком адкрыла вечар загадчык цэнтра рамёстваў і традыцыйнай культуры Ірына Смірнова. — Кожнаму пакаленню застаецца ў спадчыну тое, што створана талентам і працавітасцю дзядоў і прадзедаў, тое, што выяўляе нацыянальнае аблічча народа, яго душу, яго імкненні, тыя скарбы, якія трэба берагчы і памнажаць.
Ірына Смірнова раскрыла некалькі сакрэтаў саломапляцення. Усе разам дакрануліся да непаўторнай прыгажосці, створанай залатымі рукамі вопытных і таленавітых майстрыц з Іўя — Леакадзіі Канстанцінаўны Іваноўскай і Марыі Вікенцьеўны Кяўлен.
Леакадзія Канстанцінаўна — нязменная актывістка клуба «Скарбніца». Са сваім чароўным калаўротам, непаўторнымі вышыўкамі і саматканымі ручнікамі, цудоўнымі беларускімі напевамі і прымаўкамі, яна заўсёды ўдзельнічае ў раённых і рэгіянальных святах. Запамінальнай для яе была сустрэча з Прэзідэнтам А. Лукашэнка 21 жніўня г., падчас якой жанчына паказвала майстар-клас па прадзіву. У доме Леакадзіі Канстанцінаўны сапраўдны музей народнай творчасці.
Марыя Вікенцьеўна валодае ўсімі відамі традыцыйных рамёстваў: ткацтвам, вышыўкай, вязаннем, прадзівам. Ёй таксама давялося сустрэцца з нашым Прэзідэнтам і яна паказала тады майстар-клас па ткацтве паясоў. Гэты ж майстар-клас Марыя Вікенцьеўна правяла для гасцей мерапрыемства.
Віталі работніка Іўеўскай раённай бібліятэкі, вышывальшчыцу Ірыну Тадэўшаўну Траццякевіч. Непаўторныя вышываныя карціны, прадстаўленыя на выставе, – яе залатых рук справа. Майстар-клас па ткацтве паясоў прадэманстравала Аміня Мустафаўна Мусіна. Таленавіты кулінар і агароднік бездакорна валодае рознымі тэхнікамі дэкаратыўна-прыкладной творчасці. Яна спасцігае традыцыйныя рамёствы: пражу, вышыўку, ткацтва паясоў, качанне.
З вялікай ахвотай жанчына вывучае новыя тэхналогіі, працуе са скурай, цестам, тэкстылем. Якія ж прыгожыя вышываныя ручнікі, сурвэткі, кошыкі, створаныя рукамі таленавітай майстрыцы!
Здзівіў майстар-клас «джутавая філігрань» — новы напрамак вырабу з джутавай ніткі розных узораў і завіткоў. Яго правяла чароўная майстрыца, актывістка клуба «Скарбніца», кіраўнік гуртка ТЦСАН Таццяна Малочка. Таццяна навучае маладых інвалідаў майстэрству ручной работы ў розных тэхніках. Яна захапляецца сучаснымі відамі рамяства.
Прафесійны малюнак і майстэрства выцінанкі — “фішка” Ларысы Горбач. Аб гэтым быў і яе майстар-клас.
Прыгажосць з тэкстылю і паперы паказала Ірына Шчарбачэвіч, а вышываныя карціны і сурвэткі – Валянціна Біскуп.
Вечар упрыгожыў яшчэ адзін майстар-клас – па традыцыйным, лёгкім, бліскучым танцы «полька-матылёк».
Хотите читать актуальные новости Ивья и Ивьевского района первыми? Подписывайтесь на наш Телеграм-канал по ссылке https://t.me/ivyenews
Ірына Халява.
Фота Станіслава Зянкевіча.
